કૈંક ડૂમાનો ભર્યો ભંડાર ખાલી થાય છે...

કૈંક ડૂમાનો ભર્યો ભંડાર ખાલી થાય છે
પત્ર છલકાતો રહે,લખનાર ખાલી થાય છે.

બાદશાહી છોડવાનો મેં કર્યો કેવળ વિચાર
વાહ વાહીથી ભર્યો દરબાર ખાલી થાય છે.

હસ્તરેખાઓ ઉઝરડાથી હવે ટેવાય ગઈ
સાવ ખાલી હાથ વારંવાર ખાલી થાય છે.

સાવ નાની વાતમાં ઘર છોડીને ચાલ્યા ન જાવ
છાતીનો અડધો અડધ વિસ્તાર ખાલી થાય છે.

આ નદીમાં એક જણ પડતું મુકી…ડૂબ્યું નહીં
બહુ ઝડપથી એટલે પગથાર ખાલી થાય છે. 

-કિરણ ચૌહાણ